ИТЭВОН | Ослын өмнө АНХААРУУЛГА өгсөн бүсгүйн бичлэг цацагдав
Дэлхий
(Өмнөд Солонгос)
Аравдугаар сарын 29-нд Итэвонд болсон Хэллоуины баярын үеэрх зүрх шимшрэм үйл явдлыг шалгах мөрдөгчдийг баг ажлаа эхлүүлээд байгаа билээ.
Мөрдөгчид осол болсон газрын ойролцоох хяналтын камерын бичлэг болон олон нийтийн сүлжээнд тавигдсан бичлэгнүүдийг цуглуулан, мөрдлөгийн ажиллагаа явуулж байна.
Үүнтэй зэрэгцэн нэгэн цочирдом мэдээлэл дэлгэгдлээ.
Нэгэн стриймэр бүсгүй Итэвонд шууд дамжуулалт хийхээр очжээ.
Энэ үеэр маш их хүн байгааг дурдсан тэрээр шахцалдаж байх үедээ хэтэвчээ алдсан байна.
Удалгүй ойролцоох цагдаагийн хэсэг дээр очиж, энэ тухайгаа мэдээлэхдээ олон хүн байгаа учир хүмүүс бэртэж, осол гарах эрсдэлтэй байгааг сануулжээ.
Гэсэн ч цагдаа нар түүний яриаг үл тоон, очих боломжгүй гэх хариулт өгчээ.
Мөн бүсгүйн хэтэвчийг одоо олж өгөх боломжгүй байгаа тул маргаашийг хүртэл хүлээх хэрэгтэй тухай хэлсэн байна.
Цагдаагийн хэлтсээс гарсны дараа тэрээр шууд дамжуулалтаараа үзэгчдэд хандан "Би Итэвонд шууд дамжуулалт хийж чадахгүй нь ээ.
Энд нэг бол шахагдаж үхнэ, эсвэл дарагдаж үхнэ.
Зураг ч авч чадахгүй нь.
Хэд хэдэн удаа унах шахлаа.
Хүмүүс араас маш хүчтэй түлхэж байна" гэжээ.
Уг явдал осол болохоос нэг цагийн өмнө болжээ.
Хэдийгээр Итэвонд ажиллах цагдаа нарыг хуваарилсан байсан ч тэд зөвхөн автомашины замын хөдөлгөөнийг л зохицуулж байсан аж.
Тус газарт ойролцоогоор 100.000 орчим хүн цугласан гэх тооцоо гарсан.
Өмнө нь энд 200.000 орчим хүн цуглаж байсан ч ямар нэгэн хүн гэмтэж, бэртсэн тохиолдол гарч байгаагүй.
Энэ үед цагдаа нар хүмүүсийн хөдөлгөөнийг сайтар зохицуулж байсан нь болзошгүй ослоос урьдчилан сэргийлж чаджээ.
Харин энэ удаад хангалттай зохицуулалт хийгээгүй нь осол гарах хамгийн том шалтгаан болсон тухай эх сурвалжууд мэдээлж байна.
