Халиа дошин болон шар усны үерт автсан хороодод ажиллаж, иргэдтэй санал солилцлоо
Нийгэм
Сонгинохайрхан дүүргийн зарим хороодод халиа дошин болон шар усны үерээс болж гудамж талбай усанд автаж, иргэд хөдөлгөөнд оролцоход хүндрэл учирч байна. Тиймээс дүүргийн Засаг дарга Н.Алтаншагайгаар ахлуулсан ажлын хэсгийн бүрэлдэхүүн нөхцөл байдал хүндэрсэн 33, 35 дугаар хороонд ажиллалаа.
Сонгинохайрхан дүүргийн 33 дугаар хороо буюу Тахилтын наймдугаар гудамжны хэсэг усанд автсанаар иргэд хашаанаасаа гарах, автомашин зорчих боломжгүй болсноор 70 гаруй өрхийн дунд хүндрэл үүсчээ.
Тус иргэдийн төлөөлөл ажлын хэсгийнхэнтэй уулзаж өнгөрсөн жил хороотой хамтран ойролцоох булгийн эхэнд хамгаалалтын хашлага барьж, хоолой тавьснаас болж гуу жалга дамнан ус их хэмжээгээр орж ирэх болсныг тайлбарлав. Тиймээс одоо усны урсгал дагуу дахин хоёр хоолой тавьж далан руу хүргэх шаардлагатайг хэлж байлаа. Ажлын хэсгийнхэн иргэдийн хүсэлтийг хүлээн авч тооцоо судалгааг дахин судалж усанд автаагүй айл өрхийг эрсдэлд оруулахгүйгээр асуудлыг хурдан хугацаанд шийдвэрлэхийг дүүргийн Засаг дарга Н.Алтаншагай үүрэг болголоо.
Харин 35 дугаар хороо буюу Нарангийн гол хэсэгт мөн л өнгөрсөн жил байршуулсан хоолойнууд хөлдөж, бөглөрснөөс болж гудамж талбай усанд автсан байлаа. Тиймээс тус хорооны удирдлагууд болон иргэд ихэвчлэн зорчдог гурван байршилд гүүрэн гарц барьж өгөхийг ажлын хэсгийнхэнд хорооны Засаг дарга уламжлав.
Мөн үерийн аман дээр болон өндөр хүчдэлийн дор зөвшөөрөлгүй буусан айлууд үерт автаж нөхцөл байдал хүнд байгаа учраас тэдгээр айлуудад зохих шаардлагыг хүргүүлж арга хэмжээ авч өгөхийг хорооны Засаг дарга Д.Баярсайхан хүслээ.
Дүүргийн Засаг дарга Н.Алтаншагай ажлын хэсэгт багтсан Газар зохион байгуулалтын албаны дарга Б.Батцагаанд тэрхүү айлуудын газрын зөвшөөрлийг судалж, өөр суурьшлын бүсэд нүүлгэн шилжүүлэх боломж буй эсэхийг тооцоолон хороодын удирдлагуудтай хурдан шуурхай хамтарч ажиллахыг үүрэг болголоо.
