Зүрхний ховор өвчин туссан эмчид туслахыг уриаллаа
Нийгэм
Хөвсгөл аймгийн Зоонозын өвчин судлалын төвийн халдвар судлагч эмч Б.Баасандорж халдварын голомтод ажиллаж байгаад гэнэт зүрхний хүнд хэлбэрийн өвчнөөр өвдөн эмнэлэгт хүргэгджээ.
Зүрхний ховор тохиолдох марфаны хам шинж гэсэн оношоор яаралтай мэс засалд орох шаардлагатай болсон ба хагалгааны төлбөр 100.000.000 төгрөгийн өртөгтэй боловч ЭМД-аар 90% төлөгдөж 10.000.000 төгрөгийг өөрөөсөө төлөх болоод байна.
Иймд хамт ажиллаж байсан хамт олон, найз нөхөд, мэргэжил нэгт нөхдөөс нь Б.Баасандорж эмчид хандивын гараа сунгаж, сэтгэлийн тэнхээ өгөөрэй гэж Хөвсгөл аймгийн ЗӨСТ-ийн хамт олноос уриаллаа. /Хандивын данс: ХААН банк 5890901672 Б.Баасандорж/
Б.Баасандорж нь Хөвсгөл аймгийн Цэцэрлэг суманд гуравдугаар сарын 15-нд короновируст халдвар /ковид-19/-ын батлагдсан тохиолдол бүртгэгдсэн өдрөөс хойш тус суманд голомтын тандалт судалгаа хийх, эрсдэлийг үнэлэх, хавьтлуудыг тогтоох, шинжилгээнд сорьц авах, ариутгал халдваргүйжүүлэлт хийх зэрэг ажлыг удирдан зохион байгуулж дуудлагын баг удирдан 14 хоногийн турш ажилласны үр дүнд голомт хумигдаж халдвар тархах эрсдэлийг бууруулж чадсан билээ. Мөн 2020 оны 11 дүгээр сард Дархан-Уул аймагт бүртгэгдсэн халдварын голомтод ажиллаж, голомтыг бүрэн таслан зогсооход багаа удирдан ажилласан.
Гэвч гуравдугаар сарын 28-ны өдөр Цэцэрлэг суманд ажил үүргээ гүйцэтгэж яваад гэнэт зүрхний хүнд хэлбэрийн өвчнөөр өвдөж Цэцэрлэг сумын сэхээн амьдруулах эрчимт эмчилгээний тасагт хэвтэн эмчлүүлж байгаад яаралтайгаар УБ хотын Улсын гуравдугаар төв эмнэлгийн зүрхний мэс заслын тасагт хүргэгдээд байна.
Эмч нарын зөвлөгөөнөөр зүрхний ховор тохиолдох марфаны хам шинж /зүрхний гол судасны хэвлийн ханын урагдалт/ гэсэн оношоор яаралтай мэс засалд орох шаардлагатай болсон ба хагалгааны төлбөр 100.000.000 төгрөгийн өртөгтэй боловч ЭМД-аар 90% төлөгдөж 10.000.000 төгрөгийг өөрөөсөө төлөх болоод байна. Баасандорж эмч эхнэр 3 хүүхдийн хамт амьдардаг. Бага хүүхэд нь ой ч хүрээгүй залуу гэр бүл юм.
Дэлхий нийтийг доргиосон энэ аюулт цар тахлын эрсдэлтэй хүнд нөхцөлд өвчлөлийн голомтод өөрийн эрүүл мэндийг үл хайхран өдөр шөнөгүй ажиллаж байгаад эрүүл мэнд, амь нас нь эрсдэлтэй байдалд хүрсэнд ажлын хамт олон бид үнэхээр харамсаж байна гэж ХӨСҮТ-өөс мэдээллээ.
Холбоотой мэдээ
