Сүүлийн 24 цагт 2263 хүнээс халдвар илэрч, нийт батлагдсан тохиолдол 78347 болж нэмэгдлээ. 

Энэ хугацаанд найман хүн нас баржээ. 

Ингэснээр Covid-19-ийн шалтгаант нийт нас баралт 369 боллоо. 

Шинээр батлагдсан тохиолдлуудаас Улаанбаатарт 1650, орон нутагт 613 тохиолдол илэрчээ. 

Шинээр батлагдсан нийт тохиолдлын 30 орчим хувь нь Баянзүрх дүүрэгт бүртгэгдсэн байна.

Covid-19-ийн шалтгаант нас баралтын талаар тодруулбал, тавдугаар сарын 22-ны өдөр онош нь батлагдсан 62 настай эрэгтэй 20 орчим хоног эмнэлэгт хэвтэн эмчлүүлж байгаад Covid-19 болон бусад хавсарсан өвчний улмаас нас барлаа.

Мөн тавдугаар сарын 27-нд онош нь батлагдсан 57 настай эрэгтэй 16 орчим хоног эмнэлэгт хэвтэн эмчлүүлж байгаад нас барлаа.

66 настай эмэгтэй гурав хоног эмнэлэгт хэвтэн эмчлүүлж байгаад хавсарсан өвчний улмаас нас барсан байна.

42 настай эмэгтэй дөрөв хоног эмнэлэгт хэвтэн эмчлүүлж байгаад covid-19-ийн нэн хүнд хэлбэрээр нас барлаа.

Энэ бол ЭМЯ-наас өгсөн мэдээлэл.

Өөрөөр хэлбэл, Монгол Улс цар тахлын өмнө өвдөг сөгдөж байна.

УОК-ын төлөвлөлтийн багийн гишүүн, МУИС-ийн Физикийн тэнхимийн эрхлэгч, дэд профессор Д.Улам-Оргихын хэлснээр байдал маш хүнд, халдварын тохиолдол буурах нь бүү хэл хоногтт 4000 хүн халдвар авах эрсдэл өндөр байгаа аж. 

Тэрбээр “Орон нутагт байдал их хүндэрч байна. 

Бодит байдал эмнэлгийн ачааллаас давж, гамшгийн хэмжээнд дөхлөө. 

Эмч эмнэлгийн ажилтнууд аргаа тасартал хичээж байна. 

Цаашид өдөрт бүртгэгдэх халдварын тоо бодитоор 4000-д хүрч магадгүй” гэжээ.

Гурван сая хүн амтай Монгол Улсад өдөртөө 2000 хүн халдвар авч байгаа хүн амтай харьцуулахад өндөр тоо. 

Олон сая хүн амтай БНСУ гэхэд өдөртөө 2000-аараа халдвар авахгүй байна шүү дээ. 

Худалч хүнд Энэтхэгээс илүү хүнд нөхцөлд Монгол орсон гэсэн үг. 

Тиймээс дэлхийн улс орнууд “Монголд ковид улаанаараа эргэж байна” хэмээн ард иргэддээ Монголд очихгүй байхыг сэрэмжлүүлэх болсон байна. 

Гэтэл Монголынх нь эрх баригчид нь сонгууль дууссан гэсэн аятай чихэн дүлийн нүдэн балай суусаар.

Цар тахал ийнхүү гамшгийн хэмжээнд хүрсэн нь сонгуулийн үйл ажиллагаатай холбоотой. 

Мөн Засгийн газрын буруу бодлого шийдвэрээс болж, Монгол Улс тахлын өмнө цагаан тугаа өргөөд байна.  

Учир нь, вакцин хийлгээд 14-өөс дээш хоног болсон нөхцөлд хөдөө явах эрхтэй гээд хэлчихсэн биш орон нутгаа улаан бүс болгочихлоо. 

Одоогоор Монголын 73 сум хөл хорионд орсон байна.

Мөн Ерөнхийлөгч хавтгайруулан шагнал олгосон нь ёстой л дайрин дээр давс үрнэ гэгч болов. 

Шагналын угаалга, найруудаас болж  халдвар хуурай өвсөнд тавьсан түймэр шиг дэгдэж байна.  

Шагналыг баруун солгойгүй тарааж, нийгмийн эрүүл мэндэд заналхийлсэн нь Ерөнхийлөгчийн эл үйлдэл үнэхээр увайгүй, ёстой явах хүнээр ачаа бүү татуул гэгч л боллоо.

Өөрөөр хэлбэл, санаатай, санамсаргүй ч бай Ерөнхийлөгчийн гавъяа шагналын хур иргэдээ өвчин тахал руу түлхсэн үйлдэл болж харагдаж байна.

Засгийн газар УОК бодлого гаргаж, ажиллах чадамж ч алга!!!

Өвчин, тахалдаа “сүйрч” байгаа Монголыг минь бурхан өршөөг!

Хонгилийн үзүүрт гэрэл ч харагдахаа байлаа тэнгэрт заяат Монголчууд минь хувь заяагаа хэний гарт атгуулаад байна вэ?!?!?!