“Чингис хаан” олон улсын нисэх буудлын анхны нислэгийн ёслол
Нийгэм
- Монгол Улсын Ерөнхийлөгч У.Хүрэлсүхийн нээлтийн үг:
“Одоогоос гурван жилийн өмнө буюу 2018 онд миний бие Япон Улсын Ерөнхий сайдын урилгаар тус улсад албан ёсны айлчлал хийх үеэр хоёр орны харилцаа, хамтын ажиллагаа, Стратегийн түншлэлийн чиглэлээр олон асуудал яригдсаны дотор хамгийн ихээр онцгойлон ярьсан нэг асуудал нь энэ нисэх буудлын барилгыг барьж, ашиглалтад оруулах байсан бөгөөд энэ талаар хоёр орны Ерөнхий сайд нар санал бодлоо солилцож, хамтарч ажиллахаар болсон юм.
Түүнээс хойш шинэ нисэх буудлын төслийн олон ажил эрч хүчтэй явагдан, өнгөрсөн жил бид нар шинэ нисэх буудлаа хүлээн авсан.
Цар тахлын харгайгаар энэ ажил тодорхой хугацаанд хойшлогдсон ч өнөөдөр албан ёсоор Монгол Улсаас Япон Улсын Токио хотын чиглэлд анхны нислэгээ үйлдэх түүхэн үйл явдал болж байна.
Манай хоёр орны ард түмний харилцаа, хамтын ажиллагааны бэлгэ тэмдэг болсон, ийм сайхан үйл явдал болж байна.”
- Элчин сайд Кобаяши Хироюкийн нээлтийн үг:
“Юуны өмнө Монгол улсын засгийн газар, Монголын ард түмэнд чин сэтгэлээсэй баяр хүргэе.
Мөн шинэ нисэх буудлыг барьж эхлэхээс өнөөдрийг хүртэл хугацаанд хүчин чармаалт гарган ажилласан Япон улс, Монгол улс, болон бусад бүх улсад талархал илэрхийлье.
2018 онд Монгол Улсын Ерөнхий сайдын хувиар Япон Улсад айлчлах үедээ тухайн үеийн Ерөнхий сайд Шинзо Абэтай шинэ нисэх буудлыг шуурхай ашиглалтад оруулах тал дээр санал нэгдэн, түүнийг хэрэгжүүлэхэд манлайлан ажилласан Монгол Улсын Ерөнхийлөгч, Эрхэмсэг ноён У.Хүрэлсүх Танд хүндэтгэл үзүүлэн, гүнээ талархаж байгаагаа илэрхийлье.”
Эх сурвалж: А24 мэдээний агентлаг
Холбоотой мэдээ
