Илон Маск зэрэг Цахиурын хөндийн бизнес эрхлэгчид мансууруулах, сэтгэцэд нөлөөлөх эм, бэлдмэлээс улам бүр хамааралтай болж байгаа талаар АНУ-ын хэвлэл мэдээллийн хэрэгслүүд мэдээлэх болжээ.

Америкийн өдөр тутмын Wall Street Journal cонин орон нутгийн цагаар 27-ны өдөр дотоод эх сурвалжаас иш татан, Tesla, SpaceX, Twitter зэрэг томоохон компаниудыг удирддаг Илон Маск кетамин хэрэглэдэг хэмээн мэдэгдсэн байна. Тус мэдээнд дурдсанаар Маскыг кетамин хэрэглэж байхыг түүний эргэн тойрны хэд хэдэн хүн өөрийн биеэр харсан болохыг цохон тэмдэглэжээ.

Түүнчлэн хайлтын системийн хөгжүүлэлтээр бизнесийн гараагаа эхэлж өдгөө технологийн “аварга загаснуудын” нэг болоод буй Google-ийг үүсгэн байгуулагч Сергей Бринийн тухайд тэрээр ихэвчлэн “Шидэт мөөг" иддэг гэх шуум бий. 

SpaceX болон Facebook-ийн толгой компани болох Meta-д хөрөнгө оруулалт хийж нэр хүндтэй болсон томоохон венч хөрөнгө оруулалтын сан болох “Founders Fund” нь удирдах ажилтнуудынхаа оролцож буй үдэшлэгт мансууруулах, сэтгэцэд нөлөөлөх эмүүдийг тараадаг гэдгийг нь хүмүүс анддаггүй.

Wall Street Journal сонины өгүүлснээр “Мансууруулах, сэтгэцэд нөлөөлөх бэлдмэлийг ажлын бус цагаар хэрэглэдэг байсан бол өдгөө байгууллагын соёл болох хүртлээ дэлгэрч байна. Удирдах албан тушаалтнуудын хувьд сэтгэцэд нөлөөлөх эм, ялануяа сэтгэцэд нөлөөлөхүйц үйлдэл бүхий мөөг, кетамин, LSD зэрэг эм, бэлдмэлүүдийг бизнесийн шинэ санаа, инновацийг хөгжүүлэх хэрэгсэл болгон харж байна” хэмээн онцолсон байна.

Цахиурын хөндийд буюу АНУ-ын Калифорни мужийн Сан Франциско хотод борлуулалт, маркетингийн зөвлөхөөр ажиллаж байсан Карл Голдфилд “Өдгөө сая сая хүмүүс сэтгэцэд нөлөөлөх эм бэлдмэлийг маш бага тунгаар хэрэглэж байгаатай маргах хүмүүс олдохгүй байх” гэж байр сууриа илэрхийлжээ.

“Энэ нь ямар нэг эмнэлгийн туршилт хийгээд хөрөнгө оруулалтын боломж ч биш, харин зүгээр л компаниудын үйл ажиллагааны нэг хэсэг болсон байна. Энэхүү нөхцөл байдал нь цаашлаад мансууруулах бодисны хамаарал, эсвэл түүнээс ч муу үр дүнд хүргэх эрсдэлтэй” хэмээн тус сонины редакцын зүгээс буруушаасан байна. 

Бизнес эрхлэгчид сэтгэл түгших эмгэг, сэтгэл санааны хямралаас ангижрах, анхаарлаа төвлөрүүлэх эсвэл шинэ содон санаа гаргахын тулд энэ төрлийн бэлдмэлийг хэрэглэдэг хэмээн хэлэх нь олонтаа.

Tesla компанийн гүйцэтгэх захирал Илон Маскыг өөрийн Twitter хуудсаараа дамжуулан мансууруулах, сэтгэцэд нөлөөлөх эм, бэлдмэлтэй холбоотой хошин жиргээ хийхийг харснаас хойш энэ төрлийн бэлдмэлийг сонирхож эхэлсэн болохоо тус компанид ажиллаж байсан С.О.Свансон ярьсан байна. 

Цахиурын хөндий даяар иймэрхүү нөхцөл байдал эрчийг авч байгаа ч олон компаниуд ажилчдадаа мансууруулах, сэтгэцэд нөлөөлөх бэлдмэлийн шинжилгээ хийлгэхгүй байгаа нь үүнийг өөгшүүлж буйн илрэл байж мэдэх юм. 

Илон Маск болон Сергей Брин нар Wall Street Journal сонины энэхүү мэдээлэлтэй холбоотойгоор ямар нэгэн мэдэгдлийг одоог хэр нь хийгээгүй байна. 

Эх сурвалж: JoongAng